Марат Айзатуллин Казанда өлешләп төзү объектларын карады
Торакны 2021 елда файдалануга тапшыру планлаштырыла. ТР Төзелеш, архитектура һәм торак-коммуналь хуҗалык министры Марат Айзатуллин бүген Казанда проблемалы йортлар төзүнең барышын тикшерде. Карау урынында ул подрядчылар белән агымдагы вәзгыять турында фикер алышты, шулай ук башкарылган эшләрнең темпларын һәм сыйфатын бәяләде. Чарада шулай ук ТР Төзелеш, архитектура һәм торак-коммуналь хуҗалык министры урынбасары Илшат Гимаев, Татарстан Республикасы өлешчеләренә ярдәм фонды башкарма директоры Иван Новиков, «Главинвестстрой РТ» ГКУ директоры урынбасары Илдар Рәшитов, Казан шәһәре Башкарма комитетының Капиталь төзелеш һәм реконструкция идарәсе башлыгы Марат Сәмигулин, подрядчы оешма вәкилләре катнашты. Министр һәм аны озатып йөрүче затлар булган беренче объект Достоевский урамындагы күп фатирлы торак йорт булды. Хәл турында «Бриз» төзелеш компаниясе директоры Андрей Беляков сөйләде. Аннары «Алтын уртача»торак комплексының кайбер проблемалы объектларын карадылар. Биредә күчмә киңәшмәдә катнашучылар 3-нче номерлы йортны карап чыктылар һәм 6-нчы номерлы йорт буенча хәл турында фикер алыштылар. Татарстан Төзелеш министрлыгы башлыгы объектларны тапшыруның планлы срокларын үтәргә кирәклеген белдерде.